المشهد السابع

المشهد السابع
(يدخل عصام حاملاً سلماً ملوناً ومزيّنا بشكل ملفت، يتبعه بعض أهالي القرية)
عصام:
تعَا تْفَرَّجْ.. تَعَا شُوفْ
مِسْتَقِبْلَكْ عَ الْمَكْشُوفْ
تَعَا تْفَرَّجْ.. تَعَا شُوفْ
مِسْتَقِبْلَكْ عَ الْمَكْشُوفْ
أم سامي:
شُو بَاكْ يا عِصام حَامِلْ السِّلُّمْ بِالعِرْضْ.. الظّاهِر بِطَّلْت تْبيع بَطاطا؟
عصام:
أَيَّا بَطاطا أَيَّا بَلُّوط.. هَيْدَا سِلُّمْ الْمُسْتَقْبَلْ.. الْبَدُّو يْشُوفُ مِسْتَقِبْلُو يِدْفَعْ دُولارْ وِيْعَرْبِشْ عْلَيْه..
بو سامي:
أَنَا عَارِفْ مِسْتَقِبْلِي زِفْتْ.. بَسّْ بَدِّي عَرْبِشْ.. خُودْ هَيْدَا دُولارْ..
أم سامي:
خَبِّرْني شُو عَمْ بِتْشُوفْ؟.. شُو بَاكْ سَاكِتْ؟..
عليا:
عَ مَهْلِكْ عْلَيْهْ.. مُشْ شَايِفْتِيهْ رَحْ يُوقَعْ وِيْفِكّْ رَقِبْتُو.. نَزّلُوهْ يَا عَمِّي نَزّلُوهْ..
أم سامي:
يِقْلَعْ لِيكْ وِلْسِلّمَكْ.. مِدْرِي شُو عْمِلْتْ بْجَوْزِي.. حْكِيلَكْ شِي كِلْمِه يَا بُو سامي..
بو سامي:
سِلُّمْ الْمُسْتَقْبَلْ بِيقُولْ: غَيِّرْ عَ ضِرْسَكْ يَا بُو سامي..
أم سامي:
شُو عَمْ بِتْقُولْ؟!.. رَاحِتْ عْلَيْكِي يَا إِمّ سامي..
أَوِّلْ نْزُولُو شَمْعَه طُولُو..
دَخِيلْكُنْ قِيمُولِي هَالسِّلُّمْ مِنْ هَوْنْ..
رَح يْغِبّ عَ قَلْبِي..
عصام:
قَبِلْ مَا يْغِبّْ عَ قَلْبِكْ طْلَعِي شُوفِي مِسْتَقْبَلِكْ.. مِينْ بْيَعْرِفْ.. يِمْكِنْ تْحِطِّي لْبُو حَنَّا وِزِكْ..
أم سامي:
إِذَا كَانْ هَيْكْ.. خُودْ يَا مْعَلِّمْ.. هَيْدَا دُولارْ مْعَتَّقْ.. مْخِبَّايْتُو لْوَقْتْ الْحَشْرَه.. انْشَاللَّـه يْكُونْ وِجُّو خِيرْ عْلَيِّي..
بو سامي:
عَ مِهِلْكُنْ عْلَيْهَا.. إِمّ سامي مَا فِيهَا تْعَرْبِشْ.. بِتْخَافْ مْنِ الْعِلُو.. هَدُّوهَا مْنِيحْ.
أم سامي:
(تضحك بصوت عالٍ)
قَهْ.. قَهْ .. قَهْ.. قَهْ.. قَهْ.. قَهْ.. قَهْ.. قَهْ..
بو سامي:
يَا إِمّْ سامي.. عَمْ تِسْمَعِينِي؟.. ضَحّكِينَا مَعِكْ.. قُولِيلْنَا شُو عَمْ بِتْشُوفِي..
أم سامي:
(تضحك بصوت أعلى)
قَه.. قَه.. قَه...........
بو سامي:
إِذَا مَا بْتِنِزْلِي رَحْ إِسْحَبْ السِّلُّمْ مِنْ تِحِتْ مِنِّكْ.. وْتُوقَعِي عَ الأَرْضْ وِتْفِكِّي رَقِبْتِكْ..
عليا:
الْحَمْدِللَّـه نِزْلِتْ.. عَجّلِي يَا إِمّ سامي.. قُولِيلْنَا شُو شِفْتِي..
أم سامي:
شِفِتْ.. شِفِتْ.. قَهْ.. قَهْ.. قَهْ.. شِفِتْ بُو سامي عَمْ بِيغَيِّرْ عَ ضِرْسُو قَامِتْ طَقِّتْ وَجِبْتُو.. قَهْ.. قَهْ.. قَهْ
بو سامي:
سْلامِةْ قَلْبِي انْشَاللَّه.. وَجِبْتِي بَعْدَا جْدِيدِه.. وِسْنَانِي قَطِّيعَه..
عليا:
يَا صَاحِبْ السِّلُّم.. فِينِي شُوفْ مِسْتَقِبْلِي.. صَرْلِي عِشْرِينْ سِنِه عَايْشِه بَلاَ مُسْتَقْبَلْ..
عصام:
دْفَعِي دُولارْ أَمِيرْكَانِي وْغَنِّي أَمَانْ.. أَمَانْ أَمَانْ.. أَمَانْ أَمَانْ.. يَا زَمَانِي.
أم سامي:
شُو بِكِي طْلِعْتِي وِنْزِلْتِي بْهَالسِّرْعَه.. مَا حَلِّكْ تْشُوفِي شِي..
عليا:
لا تِعِتْلُوا هَمِّي أَبَداً.. شِفْتْ الْبَدِّي شُوفُو بْسِرْعَه قَوِيِّه..
أم سامي:
هَاتِي.. خَبّرِينَا تَا نْشُوفْ.. شُو شِفْتِي بْهَالسِّرْعَه الْقَوِيِّه؟!
عليا:
شِفِتْ مَنْتُورَه عَمْ تِتْزَوَّجْ عَبْدُو.. وْشِفْتْ رَئِيسْ الْبَلَدِيِّه بِالْحَبِسْ.. وْشِفْتْ إِعْضَا الْبَلَدِيِّه بِالْحَبِسْ.. وْشِفْتْ إِمّ سْلَيْمَانْ بِالْحَبِسْ كَمَانْ.. وْبِالِعْلامِه كَانِتْ عَمِ تْقَوِّرْ كُوسَى.
بو سامي:
رَئِيسْ الْبَلَدِيِّه وْمَرْتُو عَمْ بِيقَوّرُوا كُوسَى بْأُسْتْرَالْيَا.. إِعْضَا الْبَلَدِيِّه عَمْ بِيقَوّرُوا كُوسَى بِالِبْرَازِيلْ.. مَا بِقِي هَوْنْ إِلاَّ مَنْتُورَه..
عليا:
مَنْتُورَه بَدَّا تِتْزَوَّجْ بَعِدْ يَوْمَيْنْ.. بَسّْ مُشْ رَحْ تِعْمِلْ عِرْسْ.. قَالْ مَحْزُونِه عَ مَوْتْ الْعَدَالِه..
عصام:
بِتْرَجَّاكُنْ الْبِيعَرْبِشْ عَ سِلّمِي مَمْنُوعْ يِحْكِي بِالسّيَاسِه.. مَا بَدِّي وَجَعْ رَاسْ..
رستم:
Let me see my friend let me see.. I'd like to see my future
عصام:
مَا حَدَا يْقِلّلُو الشَّوْفِه بْدُولارْ.. Give me please ten dollars
رستم:
مَا حَدَا يْقِلّلُو الشَّوْفِه بْدُولارْ.. شُو مْفَكّرْنِي مَا بِفْهَمْ عْلَيْكْ؟
عصام:
عَرْبِشْ يَا خَيِّي عَرْبِشْ.. بَسّ انْتِبِه لَتْفِكّ رَقِبْتَكْ
رستم:
NO.. NO.. OH MY GOD
عليا:
شُو شِفِتْ يَا مِسْتِرْ رستم.. فِيكْ تْخَبِّرْنَا؟
رستم:
شِفْتْ شُوفِيرْ وَقَّفْ عَ الضَّوّ الأَحْمَرْ.. نِزْلُوا عْلَيْه كِلّْ الشُوفَارِيِّه.. وْصَارْ كِلّ وَاحِدْ مِنُّنْ يِسْلَخُو كَفّْ وِيْقِلّلُو: يَا حْمَارْ إِسَّا ِبتْوَقِّفْ عَ الضَّوّ الأحْمَرْ؟
بو سامي:
كِلّْ النَّاسْ بِتْوَقِّفْ عَ الضَّوْ الأَحْمَرْ مَا عَدَا الشُّوفيرْ اللُّبْنَانِي..
رستم:
وَاللَّـه مَعَكْ حَقّْ.. مَرَّه بْسِيدْنِي مَرَقْ وَاحِدْ لُبْنَانِي عَ الضَّوْ الأَحْمَرْ.. وَقّفُو الْبُولِيسْ وْسَأْلُو: إِنْتَ مَعَكْ لايْسِنْ سْوَاقَه؟ قَلّلُو: يَاسْ. قَلّلُو: بْتَعْرِفْ قَوَانِينْ السَّيْرْ بْأُسْتْرَالْيَا؟. قَلّلُو: يَاسْ. قَلّلُو: فِيكْ تْقِلّلِي مِينْ بِيحِقّلُو
يِمْرُقْ عَ الضَّوْ الأَحْمَرْ؟. جَاوْبُو اللّبْنَانِي وْرَاسُو مَرْفُوعْ: تْلاتِه بَسّْ فِيهُنْ يِمْرَقُوا عَ الضّوْ الأَحْمرْ: آمْبِيلُونْسْ.. بُولِيسْ.. إِنْدْ لِيبَانِيزْ.
عليا:
شُو هَالْجَخّْ يَا عَمِّي شُو هَالْجَخّ؟!.. الظَّاهِرْ قِيمِتْكُنْ كْبِيرِه بْأُسْتْرَالْيَا..
رستم:
بْأُسْتْرَالْيَا.. نِحْنَا بْتَاعْ كِلُّو.. بِتْلاَقُوا فِينَا رَئِيسْ وُزَرَا وْوَزِيرْ وْنَايِبْ.. وْبِتْلاقُوا فِينَا مْهَرِّبْ حَشِيشِه وْحَرَامِي وْعَاطِلْ عَنِ الْشِّغِلْ..
عليا:
يَا عَمِّي.. الْوَاحِدْ بِيسَافِرْ تَا يِغِتْنِي مُشْ تَا يْفُوتْ عَ الْحَبْسْ...
رستم:
الْبَدُّو يِغِتْنِي بْسِرْعَه لازِمْ يْفُوتْ عَ الْحَبْسْ..
عليا:
لْعِمْرُو مَا حَدَا يِغِتْنِي.. الْحَبِسْ بِيبِهْدِلْ كْتِيرْ.. الْقَبِرْ وْلا الْحَبِسْ..
رستم:
حَبِسْ لُبْنَانْ غِيرْ حَبِسْ أُسْتْرَالْيَا.. هَوْنْ الْحَبِسْ مِتْلْ الْقِنّ.. هَوْنِيكْ مِتْلْ أُوتِيلْ بْخَمْس نْجُومْ.
(يدخل سالم مرتدياً ثياباً رثّة)
سالم:
دَخِيلْ أَللَّـه حْبِسُونِي وْرَيّحُونِي مْنِ الْقِنّْ الْعَايِشْ فِيهْ.. مْنِ الْفَرْشِه الِمْعَفّنِه.. مْنِ السَّطْحِ الْعَمْ يِدْلُفْ.. مْنِ الْكَهْرَبَا المَقْطُوعَه.. مْنِ الْمَيّْ الْمَقْطُوعَه.. مْنِ الطّرْقَاتْ الْمَقْطُوعَه.. رَيّحُونِي.. رَيّحُونِي.. رَيّحُونِي..
عليا:
هَيْدا سالِم عُضُو الْبَلَدِيّه.. شُو صابُو قَولْكُنْ.. تا مْبَهْدَل حالُو هَيْك؟
بو سامي:
الظّاهِرْ نَتْفُو التِّفْتِيش الْمَرْكَزي..
رستم:
POOR MAN.. POOR MAN أَنَا رَحْ إِدْفَعْ عَنُّو دُولارْ.. تْرِكُوهْ يْعَرْبِشْ عَ السّلُّمْ وِيْشُوفْ مِسْتَقِبْلُو..
أم سامي:
شُو بُو فَاتِحْ تِمُّو وْعَمْ يِبْرُمْ رَاسُو مِتْل الْمَسْطُولْ.. حَرَامْ عْلَيْكُنْ نَزّلُوهْ عَنْ هَالسّلُّمْ يَا جَمَاعَه..
عصام:
أَنَا صَاحِبْ السِّلُّمْ عَمْ حَاكِيكْ.. نْزَالْ أَحْسَنْلَكْ..
أم سامي:
لا تِتْعُبْ قَلْبَكْ.. مْكَبَّشْ بِالسّلُّمْ مْنِيحْ.. أَحْسَنْ شِي نْوَقّعُو هُوِّي وِالسّلُّمْ..
رستم:
نُو.. نُو.. نُو.. إِذَا وِقَّعْتُوهْ عَنِ السّلُّمْ بْيِقْعَدْ عَ الْكُومْبُو.. وْيِمْكِنْ يِخْرُبْ بَيْتْ الزَّلْمِي..
أم سامي:
شُو يِعْنِي الْكُومْبُو.. مُشْ عَمْ بِفْهَمْ عْلَيْكْ؟!
رستم:
يِعْنِي بْيِقْبَضْ.. بْيِقْبَضْ مْنِيحْ مْنِ الأَنْشُورِنْسْ..
أم سامي:
أَيَّا أَنْشُورِنْسْ أَيَّا بَلُّوطْ.. نِحْنَا بْلُبْنَانْ مُشْ بْأُسْتْرَالْيَا.. انْهَدَمْ لُبْنَانْ وْمَاتْ نِصّ شَعْبُو وْمَا حَدَا قَبَضْ شِي.. خَايْفِينْ عَ وَاحِدْ يُوقَعْ عَنِ السّلُّمْ.. دْفِشُوهْ هُوِّي وِالسّلُّمْ وِلْعِمْرُو مَا يِرْجَعْ..
رستم:
بِحْيَاتْكُنْ تْرُكُونِي إِحْكِي مَعُو.. مِسْتِرْ.. لِيسِنْ تُو مِي.. أَنَا مِسْتِرْ رستم مِنْ أُسْتْرَالْيَا.. إِذَا بْتِنْزِلْ بِعْطِيكْ عِشْرِينْ دُولارْ..
سالم:
(يهز رأسه علامة النفي)
(......)
رستم:
تْلاتِينْ دُولارْ
سالم:
(يهز رأسه علامة النفي)
(......)
رستم:
أَرِبْعِينْ دُولارْ
سالم:
(يهز رأسه علامة النفي)
(......)
رستم:
خَمْسِينْ دُولارْ
سالم:
ما بِرْضَى بْأَقَلْ مِنْ مِيةْ دُولارْ.. شِفْتُنْ كِيفْ وِقْفُوا بِالصَّفّ تَا يْعَرِبْشُوا عَ السِّلُّمْ.. كِلُّنْ بَدُّنْ يِقْبَضُوا مِتْلي. مَا بْيِنْزِلْ إِلاَّ بْمِيةْ دُولارْ أَمِيرْكَانِيِّه مُشْ أُسْتْرَالِيِّه..
رستم:
OK.. شَرِّفْ نْزَالْ.. وْهَيْدِي مِيةْ دُولارْ..
عليا:
الْمحْتال مُحْتال.. حَتَّى وْلَوْ عَرْبَش عَ السّلُّم..
حنتور:
تْفَضَّلْ يَا خَوَاجَه هَيْدَا دُولارْ.. بَدِّي شُوفْ مِسْتَقِبْلِي..
عصام:
مَا حَدَا غَيْرِي بَدُّو يْشُوفْ مِسْتَقْبْلُو..
حنتور:
بَسّ إِنْتَ صَاحِبْ السِّلُّمْ.. مَا بِيحِقلَّكْ تْعَرْبِشْ..
عصام:
صَرْلِي كِلّ النّهَارْ طَلِّعْ نَاسْ وْنَزِّلْ نَاسْ.. ومَا طِلِعْلِي إِلاَّ خَمْسِه دُولارْ.. أَخُونَا بْنَزْلِه وِحْدِه عِمِلْ مِيةْ دُولارْ.. زِيحُوا عَن السِّلُّمْ تَا شُوفْ.. إِجَا دَوْرِي تَا شَلِّحْ مِسْتِرْ رستُم.. إِي وَاللَّـه بْأَلْفْ دُولارْ مُشْ رَحْ إِنْزِلْ..
(يتركه الأهالي لوحده)
وَيْنْ رَاحُوا؟.. مِسْتِرْ رستُم.. مِسْتِرْ رررررررستُم.. وِيرْ آرْ يُو مِسْتِرْ رررررستم.. هَيْئِتُنْ رَاحُوا.. تَا إِحْمِلْ هَالسِّلُّمْ وْرُوحْ فَتِّشْ عَ رِزِقْتِي.. تَعَا تْفَرَّجْ.. تَعَا شُوفْ مِسْتَقِبْلَكْ عَ الْمَكْشُوفْ..
**

اقلب الصفحة من فضلك