المشهد السادس

المشهد السادس
(تدخل لبيبة وهي تغني)
لبيبة:
ـ1ـ
عَبْدُو حَابِبْ مَنْتُورَه
وْغَيْرَا مَا بَدُّو
وْهَيْ مَنْتُورَه شَطُّورَه
رَحْ تِخْوِتْ عَبْدُو
ـ2ـ
بْتِقْعُدْ مِنْ هَالْمَيْلْ
وْإِمَّا بْتَانِي مَيْلْ
وِبْتِطْوَلْ السَّهْرِيِّه
بْيِنْسَى حَالُو اللَّيْلْ
يَا عَبْدُو بَدِّي فِسْتَانْ
يَا عَبْدُو جِبْلِي جِزْدَانْ
يَا عَبْدُو وْإِمِّي كَمَانْ
وْلَحِّقْ يَا عَبْدُو
ـ3ـ
بَدَّا بَيْت جْدِيدْ
وْعِرْسَا يْصَفِّي عِيدْ
وْسِتَّا هَالتِّسْعِينِيِّه
يِعْمِلاَّ تِجْدِيدْ
يَا عَبْدُو شَقِّفْ دُولارْ
يَا عَبْدُو إِخْوَاتِي زْغَارْ
يَا عَبْدُو جِيرَانِي كْتَارْ
وْلَحِّقْ يَا عَبْدُو
(يدخل بعض أهالي القرية)
حنتور:
يَا عَمِّي الإِنْسَانْ قَدّ مَا يِتْغَرَّبْ.. مَا إِلُو إِلاَّ بْلادُو وْبَنَاتْ بْلاَدُو.. يِرْحَمْ اللِّي قَالْ: زِوَانْ بْلادَكْ وْلاَ الْقَمْحْ الصَّلِيبِي.
لبيبة:
مَنْتُورَه مُشْ هَيّنِه.. طِلْعِتْ قَوِيِّه كْتِيرْ.. ضَرْبِتْ عَصْفُورَيْنْ بْحَجَرْ وَاحِدْ: عَبْدُو وْعِدْنَانْ.. الأَوَّلْ رَحْ يْصِيرْ زَوْجَا وِالتَّانِي رَحْ يْصِيرْ بِالْحَبْسْ!
حنتور:
رَاحِتْ عَ عِدْنَانْ بَيْكْ.. هُوِّي وْإِعْضَا الْبَلَدِيِّه عَمْ يِرِجْفُوا مْنِ الْفَزَعْ.. مْفَتِّشْ فَايِتْ مْفَتِّشْ طَالِعْ.. عَمْ بِيقُولُوا سَارْقِينْ أَكْتَرْ مِنْ مِيةْ مَلْيُونْ دُولارْ.
لبيبة:
آهْ يَا مَنْتُورَه آهْ..
جَايْمِسْ بُونْدْ مَا عِمِلْ مِتْلِكْ..
إِمّ نِصّْ لْسَانْ بَسّْ طَالِعْ بْإِيدِكْ.
(تدخل نجيبة)
نجيبة:
حَدَا شَفْلِي خَيِّي.. هَيْأْتُو غرْقان بِالْفَرْشِه..
(يدخل عبدو)
عبدو:
غُودْ مُورْنِيغْ..
نجيبة:
غُودْ مُورْنِينْ.. غُودْ مُورْنِينْ.. يا أَحْلَى وْأَغْلى خَيّ.. انْشَاللَّـهْ نِمْتْ مْنِيحْ؟
عبدو:
مُوسْكِيتُوزْ.. مُوسْكِيتُوزْ.. كِلّ اللَّيْلْ الْمُوسْكِيتُوزْ عَمْ بِيعَقِّصْنِي..
لبيبة:
لَيْكْ.. الْمِسْكِي مْنِيحْ مَا بِيعَقِّصْ.. هَيْدِي (التُّوزْ) الْعَمْ بِتْعَقّصَكْ..
عبدو:
الْمُوسْكِيتُو قَدّْ طِيَّارْةِ الْهَلِيكُوبْتِرْ.. كِلّْ اللَّيْلْ وِزّْ.. وِزّْ.. زْ..زْ..زْ.. قَوِلْكُنْ شُو بْيَاكْلُوا بْهَالِبْلادْ تَا بْيِنْصَحُوا هَالْقَدّْ..
حنتور:
بْيَاكْلُوا زْبَالِه.. مَا فِي أَكْتَرْ مْنِ الزّبَالِه..
الأَشْجَارْ قَلُّوا.. الأَزْهَارْ قَلُّوا..
الِعْصَافِيرْ قَلُّوا.. الْفَرَاشَاتْ قَلُّوا..
وْكِتْرِتْ الزّبَالِه..
عبدو:
O, MY GOD.. قَدّ مَا الْبَرِغْشِه كْبِيرِه.. خِفِتْ تِحْمِلْنِي وْتِشْلَحْنِي بِالْوَادِي..
نجيبة:
تِقْبِرْ إِخْتَكْ انْشَاللَّه.. جَايِي مِنْ أُسْتْرَالْيَا تَا تْشُوفْنِي وْخَايِفْ مْنِ الْبَرْغَشْ لَيِشْلَحَكْ بِالْوَادِي.. إِي أَللَّـه مَا يْخَلِّينِي إِذَا بْخَلِّي بَرِغْشِه بِالْبَيْتْ..
عبدو:
ثَانْكْيُو مَايْ سِيسْتَا.. ثَانْكْيُو فِيري ماتْشْ.. أَنَا رَاجِعْ نَامْ..
(نجيبة وعبدو يخرجان)
حنتور:
هَالأُسْتْرَالِيِّه مُشْ شَاطْرِينْ إِلاَّ بِالنَّوْمْ.. بَدَلْ مَا يْرُوحُوا يْشُوفُوا أَرْضْ يِشِتْرُوهَا.. شِقَّه يِفِرْشُوهَا.. فَبِرْكَه يْمَشُّوهَا.. بِيدَلُّوا يْشَنِخْرُوا..
لبيبة:
لَوْ كِلّْ وَاحِدْ مِنُّنْ بْيِشِتْرِي صَخْرَه بِبْلادُو كَانْ تْعَمَّرْ لُبْنَانْ.. وْصَارْ مِنْ أَغْنَى دُوَلْ الْعَالَمْ..
(يدخل رستم وهو يقوم بحركات رياضية)
رستم:
وَنْ، تُو، تْرِي.. وَنْ تُو تْرِي.. وَنْ تُو تْرِي..
حنتور:
شُو يَا مِسْتِرْ رستم.. هَيْئتَكْ قَايِمْ مْنَشَّطْ..
رستم:
أُوفْ كُورسْ.. أُوفْ كُورْسْ.. وَنْ تُو تْرِي..
حنتور:
مْبَارِحْ بِيَّضْتَا.. شْلَحْتِلَّكْ أَكْتَرْ مِنْ أَلْفَينْ دُولارْ تَحْتِ جْرَيْنْ الرِّقَاصَه..
رستم:
هَالرِّقَّاصَه فَارِي سْمَارْتْ.. وَاللَّه بْتِسْتَاهِلْ مَلْيُونْ دُولارْ..
حنتور:
لَوْ كِنْتْ تْوَزِّعْ هَالْمِصْرِيَّاتْ عَ قْرَايْبِينَكْ مَا كَانْ أَحْسَنْ؟
رستم:
شُو عَمْ بِتْقُولْ؟!.. مُشْ عَمْ إِسْمَعْ مْنِيحْ..
لبيبة:
عَمْ بِيقِلَّكْ: انْشَاللَّه مَا إِجُوا عْلَيْكْ الْمُوسْكِيتُوزْ..
رستم:
ثَانْكْ غُودْ.. الْمُوسْكِيتُوزْ مَا إِجُوا.. بَسّْ إِجُوا الْوَاوِيِّه.. كِلّْ اللَّيْلْ عَوْ.. عَوْ.. عَوْ..
لبيبة:
انْشَاللَّـه مَا زَعَجُوكْ؟!..
رستم:
نُو.. نُو.. نُو.. صَوْتُنْ عِجِبْنِي كْتِيرْ.. صَدّقْنِي.. كِلُّنْ بْيِنْجَحُوا بِسْتِدْيُو الْفَنّْ.. وَنْ تُو تْرِي.. وَنْ تُو تْرِي..
لبيبة:
كيفْ لْقَيْت لبنان يا مِسْتر رسْتُم؟
رستم:
(يسحب صورة من جيبه)
بْيُورِفُولْ.. بْيُورِفُولْ.. بْلادْنَا أَحْلَى بْلادْ بِالْعَالَـمْ.. شُوفُوا هَالْجَبَلْ شُو حِلُو..
لبيبة:
هَاتْ تَا شُوفْ، وْلِكْ هَيْدَا جَبَلْ الزّبَالِه بْبُرِجْ حَمُّودْ..
رستم:
إِذَا جَبَلْ الزّبَالِه حِلُو هَالْقَدّْ.. شُو فِينَا نْقُولْ عَنِ جْبَالْنَا الْحَقِيقِيِّه؟..
لبيبة:
جَنَّاتْ عَ مَدّْ النَّظَرْ.. مَا بْيِنْشِبِعْ مِنْهَا نَظَرْ..
رستم:
هْنِيَّالْ مِينْ لُو مَرْقَدْ عَنْزِه بْجَبَلْ لُبْنَانْ.. أَنَا رَاجِعْ عِيِشْ هَوْنْ وْمُوتْ هَوْنْ.. بْتِقْبْلُونِي بَيْنَاتْكُنْ..
لبيبة:
انْشَاللَّـه تْكُونْ رَاجِعْ مْبَحْبَحْ؟!
رستم:
تِيتِي تِيتِي مِتِلْ مَا رِحْتِي مِتِلْ مَا جِيتِي..
حنتور:
يَا مية أَهْلاَ وْسَهْلاَ فِيكْ.. إِنْتَ إِبِنَّا وْهَالِبْلادْ بْلادَكْ..
يَا رَيْتْ كِلّ الْمُغْتِرْبِينْ بْيِرْجَعُوا.. أَرِضْنَا سَايْعَه الْغِرْبِيِّه تَا مَا تْسَاعْ وْلادَا..
لبيبة:
يَا مْهَاجِرِينْ ارْجَعُوا.. غَالِي الْوَطَنْ غَالِي..
حنتور:
شُو بِكِي كِلّْ مَا وَاحِدْ فَتَحْ تِمُّو بْتِطْلَعِيلُو بْغِنِيِّه..
لبيبة:
الْحَرْبْ قِضْيِتْ عَ كِلّ شِي.. بَسّ مَا قِدْرِتْ تِقْضِي عَ الْغِنِيِّه..
حنتور:
لازِمْ نِتْرَحَّمْ عَ سِيمُونْ أَسْمَرْ قَبِلْ مَا يْمُوتْ.. بَدَلْ مَا يِدِخْلُوا الشَّبَابْ بِالْمِيلِيشْيَاتْ قَامْ دَخَّلُنْ بِالْفَنْ وْعِمِلُنْ فِنَّانِينْ.
لبيبة:
لا تْقُلي الْحَرْبْ قِضْيِتْ عَ الطَّائِفِيِّه.. كِلّْ شِي وَاقِفْ سُوقُو بِبْلادْنَا مَا عَدّا الطَّائِفِيِّه.. بَعِدْنَا مْنِشْرَبْ طَائِفِياً.. وِمْنَاكُلْ طَائِفِياً.. وِمْنِشِتْغِلْ طَائِفِياً.. وْمِنْكَذِّبْ عَ أَللَّـه طَائِفِياً..
حنتور:
إِذَا مِنْضَلّْ نْقَسِّمْ الْمُدُنْ وْنِكْتُبْ عَ مَدْخَلاَ بْشَكِلْ مُقْرِفْ.. هَيْدِي قَلْعِةْ الْمَسِيحِيِّه وْهَيْدِي قَلْعِةْ الإِسْلامْ.. قُولُوا عَ لُبْنَانْ السَّلامْ..
لبيبة:
مَهْوُوسْ دِينِي وَاحِدْ بْيِقْدِرْ يِلْعَبْ بِعْقُولْ النَّاسْ وْيِحْرُقْ بَلَدْنَا.. كِلّنَا إِخْوَانْ لِمِّنْ مْنِتْلاَقَى بِالشَّارِعْ.. وْكِلّنَا أَعْدَاءْ لِمِّنْ مْنِرُوحْ نْصَلِّي..
حنتور:
كَمَانْ الْحَرْبْ مَا قِدْرِتْ تِقْضِي عَ الزَّعَامِه.. زُعَمَاءنَا بَعْدُنْ هِنِّي هِنِّي..
رستم:
كِيفْ بَعْدُنْ هِنِّي هِنِّي؟!.. كِلُّنْ مَاتُوا وْشِبْعُوا مَوْتْ..
لبيبة:
اللِّي خَلَّفْ ما مَاتْ يَا مسْتر رسْتُم.. اللِّي خَلَّفْ مَا مَاتْ.. وْلادُنْ إِخْدُوا مْحَلُّنْ..
رستم:
شَايْمْ أُونْ يُو.. شَعْبْ بْيِفْهِمْ مَا بْيِرْضَى يْصِيرْ هَالشِّي.. نِحْنَا بْأُسْتْرَالْيَا مَا مْنِنْتِخِبْ إِلاَّ الْبِيفِيدْنَا.. حنتور:
وْنِحْنَا كَمَانْ.. مَا مْنِنْتِخِبْ إِلاَّ الْبِيفِيدْنَا.. تْطَلَّعْ بْمَجْلِسْ النُّوَّابْ مَا بِيفُوتْ عْلَيْهْ إِلاَّ اللِّي بْيِدْفَعْ..
رستم:
عَيْبْ عْلَيْكُنْ.. إِنْتُو عَمْ تِتْبَرِطْلُو..
حنتور:
وْإِنْتُو عَمْ تِتْبَرِطْلُوا كَمَانْ.. لِمِّنْ بْتِدْفَعِلْكُنْ الدَّوْلِه وْإِنْتُو عَمْ تِشْتِغْلُوا بِالسِّرْ.. شٌو؟!
لبيبة:
لِمِّنْ بِتْحَكِّمْكُنْ وْصِحِّتْكُنْ مِتْل الصَّخْرْ شُو؟!
حنتور:
لِمِّنْ بْتِدْفَعِلْكُنْ حَقّْ الدَّوَا وْبِتْهَرّبُوا الدَّوَا عَ بْلادْكُنْ.. شُو؟!
رستم:
خَلَصْ.. خَلَصْ..
لبيبة:
لِمِّنْ بِتْعَلّمِلْكُنْ وْلادْكُنْ وِوْلادْكُنْ حَمِيرْ.. شُو؟!
رستم:
وْلِكْ شُو بِكُنْ.. خَلُّوا لِلصُّلِحْ مَطْرَحْ..
حنتور:
نِحْنَا مْنِتْبَرْطَلْ مَرَّه وِحْدِه وْإِنْتُو بْتِتْبَرِطْلُوا عَ طُولْ..
رستم:
مِنْ هَيْكْ عَمْ يِسِرْقُوا الْحِكَّامْ بِبْلادْكُنْ.. نِحْنَا وْبِالْمَطَارْ سْمِعْنَاكُنْ عَمْ بِتْصِيحُوا: مَا بَدّنَا عِدْنَانْ.. بَدّنَا مَنْتُورَه.. عَمْ يِسْرُقْ لُبْنَانْ.. تَا يْعَمِّرْ قْصُورَا
لبيبة:
لَيْشْ قِلِّةْ حَرَامِيِّه بْأُسْتْرَالْيَا.. كِلّ يَوْمْ بِيفُوتْ وَزِيرْ عَ الْحَبْسْ بْتِهْمِةْ السِّرْقَه..
رستم:
بِالْقَلِيلِه عَمْ بِيفُوتْ عَ الْحَبْسْ.. فِيكي تْقوليلي وَيْنُو عِدْنَانْ؟
لبيبة:
بْأُسْتْرَالْيَا.. مْبَارِحْ سَافَرْ هُوِّي وْمَرْتُو.. وْإِذَا كِنْتُو بْتِفْهَمُوا حَاكْمُولْنَا يَاهْ.. بَرْكِي بيفُوتْ عَ الْحَبْسْ.
رستم:
عِدْنَانْ هَرَبْ؟!.. مُشْ مَعْقُولْ!!.. بَدَلْ مَا يْصِيرْ مَحْبُوسْ صَارْ مُغْتَرِبْ.. بَعِدْكُنْ بِتْقُولُوا إِنُّو لُبْنَانْ أَحْسَنْ مْنِ أُسْتْرَالْيَا؟
لبيبة:
أَكِيدْ أَحْسَنْ.. رُوحُوا عْمِلُوا حَرْبْ بْأُسْتْرَالْيَا قَدّْ رِبْع الْحَرْبْ اللّبْنَانِيِّه.. وِرْجَعُوا قُولُولْنَا شُو صَارْ..
حنتور:
عْطُونَا سَلامْ.. سَلامْ حَقِيقِي.. وْخِدُوا مِنَّا الْعَجَايِبْ.
رستم:
مِينْ بْيِحْرُقْ بَلَدُو غَيرْ الْمَجْنُونْ؟..
لبيبة:
مِينْ بْيِقْتِلْ جَارُو غَيْرْ الْمَجْنُونْ؟..
حنتور:
مِينْ بِيبِيعْ أَرْضُو غَيْرْ الْمَجْنُون؟..
رستم:
مِينْ بْيِسْرُقْ خَزِينْةْ بْلادُو غَيْر الْمَجْنُونْ؟..
لبيبة:
مِينْ بْيِتْرُكْ هَالْجَنِّه السَّمَاوِيِّه وْبِيسَافِرْ غَيْرْ الْمَجْنُونْ؟..
حنتور، رستم، لبيبة:
نِحْنَا كِلّنَا مْجَانِينْ.. قُولُوا أَللَّــه...
**

اقلب الصفحة من فضلك