المشهد الخامس

المشهد الخامس
(عبدو المغترب يناجي أرزة لبنان و معه بعض المغتربين)
عبدو:
ـ1ـ
الأَرْزِه الدَّهْرِيَّه
بَعْدَا صَبِيَّه
بْحِبَّا مِنْ قَلْبِي.. يَا سِيدْنِي
هِيِّي عِينَيَّا
شِفْتَا وِبْكِيتْ
وِهْمُومي نْسِيتْ
يَا أَرْز الرَّبّْ
تَا شُوفَكْ جِيتْ
ـ2ـ
لُبْنَانْ الأَخْضَرْ
لازِمْ يِتْعَمَّرْ
يَا قَلْبِي عَمِّرْ مِدْمَاكُو
تَايِعْلَى أَكْتَرْ
لُبْنَانْ الْكَانْ
أَحْلَى الْبُلْدَانْ
يَا شَعْبِي عُودْ
تَا يْعُودْ لُبْنَانْ
لبيبة:
صَوْتَكْ حِلُو يَا مِسْتِرْ عَبْدُو.. إِنْتْ خِلْقَانْ بْلُبْنَانْ؟!
عبدو:
لأْ.. أَنَا خِلْقَانْ بْسِيدْنِي..
لبيبة:
وَاللَّـه.. وَاللَّـه.. بْتِحْكِي عَرَبِي وْبِتْغَنِّي أَحْسَنْ مِنَّا بْأَلْفْ مَرَّه..
عبدو:
الْفَضِلْ بِيعُودْ لأمّي.. وْيا رَيْت فِيني وَدِّيلا بَرْقِيّه..
لبيبة:
شُو رَأْيَكْ تْوَدّيلاَ باقة زهر؟!
عبدو:
يَا رَيْت!.. بَسّ كِيفْ بَدّي وَدِّيهَا عَ أُسْتْرَالْيَا؟
لبيبة:
بِالْحَكِي.. نِحْنَا مْنِحْكِي وِالْبَاقَه بْتُوصَلْ.. سْمَاعْ.. يَا بَاقِةْ الْوَرْدْ.. طِيرِي.. قِلْتِلِّكْ طِيرِي عَ أُسْتْرَالْيَا وْغِطِّي بَيْنْ إِيدَيْنْ أُمّ عَبْدو.. وْقُولِيلاَ إِبْنِك مشْتَقْلِك كْتيرْ.
عبدو:
قَوِْلِك وِصْلِتْ؟!
لبيبة:
وِاسْتَلْمِتَا كَمَانْ..
عبدو:
GOOD, GOOD .. الْعَمَى شُو سَرِيعْ الْحَكِي بْلِبْنَانْ أَسْرَعْ مْنِ الإنْتِرْنِتْ بْأُسْتْرَالْيَا..
لبيبة:
لا تْلُومْنَا يَا مِسْتِرْ عَبْدُو.. قَاعْدِينْ بْلا شِغِلْ.. وْمَا عِنَّا إِلاَّ هَالْفَرْمِةِ اللَّحِمْ نِتْسَلَّى فِيهَا.
عبدو:
مُشْ عَمْ بِفْهَمْ لَيْشْ قَاعْدِينْ بْلا شِغِلْ.. وِالِبْلادْ طَالْعَه مِنْ حَرْبْ وْبَدَّا مِينْ يْعَمِّرَا..
حنتور:
جَابُوا الْغِرْبِيِّه تَا يْعَمّرُوهَا.. قَامُوا عَمّرُوا الِبْيُوتْ وْهَدَمُوا الِعْيَالْ.. وْلا تِتْعَجّبُوا إِذَا شِفْتُونَا كِلّنَا بْأُسْتْرَالْيَا.
عبدو:
انْشَاللَّـه بِتْضَلُّوا هَوْنْ وِبْتِدْعَسُوا رَقْبِةْ الْحِكَّامْ وِالْغِرْبِيِّه.. هَالِبْلادْ بْلادْكُنْ.. نْكَايِه فِيهُنْ لا تِتْخَلُّوا عَنْها.
حنتور:
أَللَّـه يِحْمِيكْ .. مَا عِرَّفِتْنَا عَ رِفْقَاتَكْ..
عبدو:
شَبَابْ وْبَنَاتْ جَايِينْ مِنْ أُسْتْرَالْيَا.. بَسّ مَا بْيِحْكُوا عَرَبِي مْنِيحْ..
حنتور:
وْلِكْ يَا أَهْلاَ يَا أَهْلاَ يَا أَهْلاَ.. يُو سْبِيكْ أَرَبِيكْ؟
سوزي:
نُوفِه.. بَعْرِفْ نُوفِه NOT MUCH..
حنتور:
خَلِّيلِي هَالنُّوفِه شُو بْتِفْقَعْ فَقَعْ بِالْعَرَبِي.. أَنَا حِطَّيْتْ عَيْنِي عَ هَالْبِنْتْ.. وْيَا دِلّ دِلُّو الْـ بِيقَرِّبْ عْلَيْهَا. COME WITH ME يَا نُوفِه COME WITH ME
سوزي:
بَايْ بَايْ إِفْرِي وَنْ
أم سامي:
يَلَّلا.. هَايْ أَوَّلْ وَاحِدْ إِخِدْ فِيزَا عَ اُسْتْرَالْيَا
لبيبة:
هَلَّقْ بْتِطْلَعْ مْطَلَّقَه.. وْعِنْدَا عِرّ وْلادْ..
أم سامي:
الْبَدُّو فِيزَا بَدُّو يْغَيِّرْ حْفَاضَاتْ وِيْرِشّْ بُودْرَه..
لبيبة:
شُو يَا مِسْتِرْ عَبْدُو.. مَا بَدَّكْ تِتْجَوَّزْ؟!
عبدو:
عِجْبِتْنِي بِنْتْ بَسّ مُشْ عَمْ تِقْبَلْ فِيِّي..
لبيبة:
بِنْتْ وِحْدِه بَسّْ؟!.. الْـ مَعُو دُولارَاتْ يَا مِسْتِرْ عَبْدُو فِيه يِتْجَوَّزْ بِالْجِمْلِه.
عبدو:
وْمُشْ عَمْ تِقْبَلْ فِيِّي كَمَانْ؟!
لبيبة:
مُشْ عَمْ تِقْبَل فِيك؟!.. أَكِيدْ لازِمْ نِعْصِرْلا شْوَيِّةْ حَامِضْ..
عبدو:
قَالْ عِنْدَا مِشِكْلِه كْبِيرِه وْبَدَّا تْحِلاَّ..
لبيبة:
وْمِينْ حَضْرِتَا هَالْمَسْطُولِه الْمُشْ فَاضْيِه تِتْجَوَّزْ؟!
عبدو:
مَنْتُورَه..
لبيبة:
مَنْتُورَه.. مَنْتُورَه مَا غَيْرَا.. إِمْ نِصّ لْسَانْ..
عبدو:
انْشَاللَّه تْكُونْ إِمّ أَرْبْعَه وْأَرِبْعِينْ.. أَنَا حِبَّيْتَا..
لبيبة:
رُوحْ شِفْلَكْ وِحْدِه غَيْرَا.. هَيْدِي مَا بْتَعْرِفْ تِحْكِي..
عبدو:
مَنْتُورَه وْبَسّْ.. وِالْبَاقِي كِلُّو خَسّْ..
لبيبة:
يِضْرَبْ الْحُبّْ شُو بِيذِلّْ.. جَايِي مْنِ بْلادْ بَامِيلا أنْدِرْسُنْ وْإِلْ مَاكْفِرْسُنْ تَا يِتْزَوَّجْ مَنْتُورَه.. وَاللّه ما تَعْرِف أخْتَكْ نَجِيبِه بَدَّا تِخْوِتْ..
عبدو:
مَنْتُورَه وْبَسّْ.. وِالْبَاقِي كِلُّو خَسّْ..
لبيبة:
عَلَّقْ الدِّيسْكْ مَعُو.. إِي وَاللَّه غَيْرْ خَسّ مُشْ رَحْ تاكُلْ..
أم سامي:
تْرِكِيه شُو بَدِّكْ فِيهْ؟.. بُكْرَا بِيغَيِّرْ فِكْرُو لِمِّنْ بِيشُوفَا فَايْتِه عَ الْحَبْسْ.. عَمْ بِيقُولُوا سَرْقِتْ أَمْوَالْ الْبَلَدِيِّه..
رمزي:
لَهْ يَا مَنْتُورَه لَهْ.. إِمّ نِصّ لْسَانْ بَسّ إِيدِكْ طَوِيلِه..
وْمِينْ قَلِّكْ هَالْحَكِي؟!
أم سامي:
رَئِيسْ وْإِعْضَا الْبَلَدِيِّه.. كِلُّنْ شِهْدُوا ضِدَّا..
رمزي:
أنا عُضُو بِالْبَلَدِيِّه وْما عْرفْت بْهَالْخَبَرْ..
عبدو:
رَاحِتْ عْلَيْكِي يَا حَبيبْتِي مَنْتُورَه.. اتَّفْقُوا عْلَيْكِي الْحَرَامِيِّه..
رمزي:
رَئِيس الْبَلَدِيِّه مُشْ حَرَامِي.. وْما تِنْسُوا إِنُّو كَرَّم الْمُغْتِربينْ..
عبدو:
حَرَامِي وْنِصّ.. وْبُكْرَا بِتْشُوفْ مِينْ رَحْ يْفُوتْ عَ الْحَبْسْ..
رمزي:
قِلْتِلَّكْ مُشْ حَرَامِي.. يِعْنِي مُشْ حَرَامِي..
عبدو:
بَسّ وْلاهْ.. عَمْ تِتْحَدَّانِي؟!
رمزي:
وْبِتْحَدَّى بَيّْ بَيَّكْ كَمَانْ.. لَيْك مِلاَّ مُغْتِرْبينْ لَيْك.
(يدخل عدنان وبعض أهالي القرية ومعهم الأسلحة)
عدنان:
شُو فِي.. شُو صارْ؟ صَوتْكُنْ هَزّ الضَّيْعَه..
رمزي:
هَوْنِي شَرْشُوحْ جايِي مِن أُستْرالْيا عَم يِتْطاوَل عْلَيْك.. حِبَّيْت رَبِيه.
عدنان:
الْمُغْتِرْبين خَطّ أَحْمَرْ..
مَمْنُوع حَدَا يْزَعِّلُنْ..
فْهمْت يا رَمْزِي..
رمزي:
وْكَرَامْتَكْ سِيدْنا ما لازِم تْكُون مَحْفُوظَه؟
عدنان:
مْنِحْفَظَا بَعْد ما يْرُوحُوا الْمُغْتِرْبِينْ.. وْهَلَّقْ تْنَيْناتْكُنْ سَوا بِتْشَرّفُوا لْعِنْدِي عَ فنْجان قَهْوه.
(يخرج عدنان ورمزي وعبدو)
أم سامي:
الْعَمَى كَانِتْ عِلْقِتْ.. عِشْرِينْ سِنِه وْنِحْنَا عَمْ نِتْرَوَّقْ وْنِتْغَدَّى وْنِتْعَشَّى مَشَاكِلْ.. حِلُّوا عَنْ ضَهِرْنَا بَقَى..
لبيبة:
سْمَعُوا مِنِّي زْرِبُوا الْمُغْتِرْبِينْ بِبْيُوتُنْ أَحْسَنْ مَا يِهِرْبُوا..
أم سامي:
كِيفْ بَدُّنْ يِهِرْبُوا وْبَعِدْ مَا فَكُّوا دِكِّتُنْ.. بَعِدْ مَا صَرْفُوا دُولارْ وَاحِدْ..
لبيبة:
هِنِّي بُخَلاَ.. بُخَلاَ كْتِيرْ.. بْيِجُوا عَ الدِّكَانْ إِجْر لْقِدَّامْ وْإِجْر لْوَرَا.. وْمَا بْيِفْتَحُوا تِمُّنْ إِلاَّ إِذَا حَدَا ضَيَّفُنْ..
أم سامي:
كَمَانْ هِنِّي تِعْبَانِينْ بْمِصْرِيَّاتُنْ.. شُو بَدّكْ يِشْلَحُوهَا عَ الطَّرِيقْ..
(يدخل رستم وهو يتكلم على هاتفه النقّال)
رستم:
أَلُو.. خَوَاجَه يُوسِفْ.. يَا عَمِّي وَيْنْ صَارِتْ هَالشَّحْنِه؟.. صَرْلِي شَهْرْ بْلُبْنَانْ وْبَعِدْنِي بَلا بِرَّادْ.. بَلاَ تِلْفِزْيُونْ.. بَلاَ طَاوْلِةْ أَكِلْ.. أَللَّـه وَكِيلَكْ عَمْ رُوحْ آكُلْ عِنْد الْجِيرَانْ.. شُو.. شُو.. لازِمْ إِدْفَعْ.. قِدَّيْشْ لازِمْ إِدْفَعْ؟!.. فُور تَاوْزِندْ دُولارْ؟!.. أَنَا غْرَاضِي كِلاَّ مَا حَقَّا هَالْقَدّْ.. عَيْبْ عْلَيْكُنْ تِسِرْقُوا الْمُغْتِرْبِينْ.. سْمَعْنِي مْنِيحْ.. يَا خَيِّي سْمَعْنِي مْنِيحْ.. غْرَاضِي مَا بَدِّي يَاهُنْ.. خَلِّيهُنْ عَ الْبُورْ.. بْخَاطْرَكْ.. قِرْطِةْ حْرَامِيِّه..
(يدخل حنتور وسوزي)
حنتور:
ـ شُو بُو مِسْتِرْ رستم طَالِعْ خِلْقُو؟..
أم سامي:
إِي وَاللَّـه رَحْ يْشَيّبُولُو رَاسُو.. شَحَنْ عَفِشْ بَيْتْ مِنْ أُسْتْرَالْيَا رَحْ تِطْلَعْ رُوحُو وْمَا يِطْلَعْ الْعَفِشْ.. كِلّ شِرْكِةْ شَحِنْ عِنْدَا وَكِيلْ.. وْكِلْ وَكِيلْ بَدُّو يَاكْلَكْ قَبِلْ مَا يْسَلّمَكْ غْرَاضَكْ.. عِصَابَاتْ.. مَافْيَاتْ.. قُولْ شُو مَا بَدَّكْ تْقُولْ.
حنتور:
مَجْنُونْ إِبِنْ مَجْنُونْ اللِّي بْيِشْحَنْ قَشِّه مِنْ اُسْتْرَالْيَا..
بْكِلْفِةْ الشَّحِنْ بَسّ.. بْتِفْرُشْ بَيْتَكْ عَ آخِرْ طَرْزْ.. وْبَلا عِصَابَاتْ.. بَلاَ مَافِيَاتْ.. بَلا سَمِّة بَدَنْ..
(يدخل عصام بائع البطاطا)
عصام:
عَ الْبَطَاطَا الْبَطَاطَا
يَا عَيْنِي عَ الْبَطَاطَا
قِدَّيْشْ مِسْتَحْلِيِّه عِيشْ
حَدَّكْ يَا بُو الدَّرَاوِيشْ
تْغَدِّينِي خِبْزْ وْزَيْتُونْ
وِتْعَشِّينِي بَطَاطَا
جِرْدِيِّه يا بَطَاطَا..
حنتور:
يَا عَمّْ.. بْقِدَّيْشْ كِيلُو الْبَطَاطَا؟
عصام:
لإِبْن الْبَلَدْ.. مِنْ دُونْ مُكَاسْرَه.. وْمِنْ دُونْ لَفّ وْدَوَرَانْ.. بْأَلْفْ لِيرَه..
حنتور:
بْيِمْشِي بْـخَمِسْمِيةْ لِيرَه..
عصام:
هَاتْ سَبِعْمِيِّه وْخَمْسِينْ.. وْقُولْ أَللَّه يْسَهِّلْ.. عَ الْبَطَاطَا.. جَبَلِيِّه الْبَطَاطَا..
سوزي:
هَاوْ مَاتْشْ الْكِيلُو..
عصام:
حَضِرْتِكْ أُسْتْرَالِيِّه وِلاَّ أَمِيرْكَانِيِّه؟..
سوزي:
لأْ.. أُسْتْرَالِيِّه.. وْمِنْ سِيدْنِي كَمَانْ..
عصام:
يَا أَهْلاَ يَا أَهْلاَ بِالْمُغْتِرْبِينْ.. عْطِينِي خَمْسِه دُولارْ بِالْكِيلُو.. وْرَيْتُو أَلِفْ صَحْتَيْنْ..
سوزي:
يِهْ.. غَالِي كْتِيرْ.. نِحْنَا وَيْنْ عَايْشِينْ؟!
عصام:
طَيِّبْ.. عْطِينِي أَرِبْعَه دُولاَرْ..
سوزي:
مُشْ مُمْكِنْ.. غَالِي كْتِيرْ
عصام:
هَاتِي تْلاتِه.. وْقُولِي: أَللَّـه يْسَهِّلْ..
سوزي:
أَبَداً.. أَبَداً..
عصام:
كِرْمَالْ سِيدْنِي وْأَهِلْ سِيدْنِي.. عْطِينِي دُولارَيْنْ..
سوزي:
نُو..
عصام:
دُولارْ
سوزي:
نُو.. نُو.. نُو..
عصام:
فِيفْتِي سَانْسْ..
سوزي:
قِلْتِلَّكْ: نو
عصام:
كِلُّو نُو.. نُو.. نُو.. يَا إِخْتِي خِدِيهُنْ بْبَلاشْ..
وْصَحْتَيْنْ عَ قَلْبِكْ..
سوزي:
إِذَا كَانْ هَيْكْ زِنْلِي خَمْسِه كِيلُو.. وْحِطُّنْ بْكِيسْ قَوِي مَا بْيِنْخِزِقْ.. لأَنِّي آخْدِتُنْ هْدِيِّه.. الْعَمَى شُو بِيطَوِّلْ تَا يِفْهِمْ..
عصام:
مِلاَّ أُسْتْرَالِيِّه..جِينَا نِتْعَشَّاهَا قَامِتْ تْغَدِّتْنَا.. عَ الْبَ.. بَ.. بَ.. بَصَلْ.. عَ الْبَصَلْ.. جِرْدِي يَا بَصَلْ..
حنتور:
شُو بَاكْ يَا بِيَّاعْ.. مَعَكْ بَطَاطَا وْعَمْ بِتْعَيِّطْ عَ الْبَصَلْ؟!
عصام:
إِذَا بِتْجِينِي زْبُونِه تَانْيِه مِتِلْ هَالزّبُونِه.. بَدِّي عَيِّطْ عَ الْبَطِّيخْ.. عَ البَطِّيخْ.. أَحْمَرْ يَا بَطِّيخْ..
حنتور:
عَ سْلامِتَا.. سُوزي أخْت الرِّجالْ ما بْيِنضحِك عْلَيْها.. سُوزِي.. سُوزي آي لاف يو..
**

اقلب الصفحة من فضلك