المشهدان الثالث والرابع

المشهد الثالث
(أهالي تل الزعرور)
أم أنطون:
يِهْ يِهْ يِهْ.. شِفْتُوا رَئِيسْ الْبَلَدِيِّه وْمَرْتُو.. هَيْئِتْهُنْ عِلْقَانِينْ؟!
نجيبة:
شُو بَدّنَا فِيهُنْ.. عَ طُولْ صَوْتُنْ طَالِعْ؟
أم أنطون:
دَخِلْكُنْ.. رَئِيسْ بَلَدِيِّه مِتِلْ هَيْدَا كِيفْ بْيِنْجَحْ بِالإِنْتِخَابَاتْ؟
نجيبة:
بْيِدْفَعْ.. النَّاسْ عَمْ بِتْبِيعْ أَللّـه بْدُولارْ.. تَا ما تْبِيعْ ضَمِيرَا!!
أم أنطون:
يَا عَمِّي لا تْلُومُوا النَّاسْ.. فِي فِقِرْ.. الْمَسْؤولِينْ عَمْ بِيعَبُّوا بْطُونُنْ وْتَارْكِينْ بْطُونْنَا فَاضْيِه..
نجيبة:
عَمْ يِلْهُونَا بْفَتْح الْمَلَفَّاتْ.. بْيِفْتَحُوا مَلَفْ وْبِيسَكّرُوا أَلْفْ.. شُو بَدّكُنْ بَعْدَا الْوَاسْطَه مَاشْيِه..
لبيبة:
لا تْخَافُوا.. بَعْدْ سَاعْتَيْنْ تْلاتِه بْتُوصَلْ طِيَّارْةْ الْمُغْتِرْبِينْ وِبْتُوصَل اللِّقْمِه عَ التِّمّ.. وْصَدّقُونِي مُشْ رَحْ يْضَلّْ بَطِنْ فَاضِي..
نجيبة:
إِذَا شِي وِحْدِه مِنْكُنْ تَقّلِتْ أَكِلْ لازِمْ تَاخُدْ سَفِّةْ كَرْبُونَاتْ.. الْكَرْبُونَاتْ بِتْدَشِّي وْبِتْهَضِّمْ..
أم أنطون:
قَالْ كَرْبُونَاتْ قَالْ.. رُوحُوا سِفُّولْكُنْ نِتْفِة مِلِحْ إِنْكْلِيزِي وِتْرَحّمُوا عْلَيِّي قَبِلْ مَا مُوتْ..
لبيبة:
إِصْحَا وْبَالْكُنْ.. اللِّي بْيَاخُدْ مِلِحْ إِنْكْلِيزِي عْيُونُو
بِتْفِرّ.. سْنَانُو بِتْهِرّْ.. وِمْصَارِينُو بِتْشِرّْ..
نجيبة:
أَخْ يَا بَطْنِي أَخْ.. دَخِيلْكُنْ لْحَقُونِي.. يِمْكِنْ مِشِي بَطْنِي..
لبيبة:
بِالأَوِّلْ مْشِي إِنْتِي قَبِلْ مَا يِمْشِي بَطْنِكْ.. فِيكِي تْقُولِيلْنَا شُو صَابِكْ؟
نجيبة:
بَطْنِي عَمْ بِيكَعْكِرْ.. بَطْنِي رَحْ يِنْفِجِرْ..
لبيبة:
هْرِبُوا.. الْمِلْحْ الإِنْكْلِيزِي بَلَّشْ يِشِتْغِلْ..
(تحاول كل واحدة الاختباء، تدخل عليا)
عليا:
لَيْكْ كِيفْ قَفُّوا مِتْل الدّجَاجْ لَيْكْ.. قُومُوا.. يَا عَيْبْ الشُّومْ عْلَيْكُنْ.. الْمُغْتِرْبِينْ رَحْ يُوصَلُوا وْإِنْتُو عَمْ بِتْسِفُّوا مِلِحْ إِنْكْلِيزِي.. إِذَا بَدّْكُنْ تِنِفْقُوا رُوحُوا ظَبّطُوا حَالْكُنْ مِتِلْ مَنْتُورَه.. شَبَابْ أُسْتْرَالْيَا جَايِينْ وْمَا فِي أَكْتَرْ مْنِ الْعَوَانِسْ بِالضَّيْعَه..
أم أنطون:
سْمِعِتْ إِنُّنْ كَحْشُوا مَنْتُورَه مِنْ مَجْلِسْ الْبَلَدِيِّه.. قَامِتْ تْشَكِّتْ عْلَيْهُنْ.. قَالْ بَدَّا تِخْرُبْ بْيُوتُنْ..
لبيبة:
أَنَا عِنْدِي إِحْسَاسْ إِنُّو التِّفْتِيشْ الْمَرْكَزِي عَمْ يِنْغُلْ بِالضَّيْعَه..
نجيبة:
مَنْتُورَه مَا بْيِطْلَعْ بْإِيدَا شِي.. رَئِيسْ الْبَلَدِيِّه وْجَمَاعْتُو مَدْعومين مِنْ بَرَّا.. وِالْمَدْعُوم مِنْ بَرَّا ما فِي حَدا بِيهِزُّو.
لبيبة:
كلُّنْ يِحْكُوا إلاّ إِنْتِي.. مَا حَدَا قَدِّكْ رَقَصْ قِدَّامُو لِمِّنْ نَجَحْ..
نجيبة:
وِانْشَاللَّـه عِجِبْتِكْ رَقِصْتِي؟
لبيبة:
بِتْجِنِّنْ.. بَسّ رَقْصِةْ مَرْتُو لَطِيفِه كانِتْ أَحَلَى.. شِفْتِي شُو فِسْتَانَا حِلُو؟..
نجيبة:
شِغِلْ بَارِيزْ يَا عَمِّي شِغِلْ بَارِيزْ.. يِرْحَمْ بَيُّو عَ يِرْحَمْ جِدُّو عَ يِرْحَمْ خَيُّو اللِّي قَال: لَبِّسْ الْعُودْ بِيجُودْ.
أم أنطون:
الْمُغْتِرْبِينْ رَحْ يُوصَلُوا وْنِحْنَا مِلْهِيِّينْ بْعِدْنَانْ وِبْمَرْتُو إِمّ سْلَيْمَانْ.. وْرَحْمِةْ سِتِّي هَالتّنَيْنْ هَوْدِي بْيِلْهُوا بَلَدْ..
لبيبة:
ـ1ـ
تِِكْ تِكْ تِكْ يَا مْ سْلَيْمَانْ
تِكْ تِكْ تِكْ جَوْزِكْ عِدْنَانْ
تِكْ تِكْ تِكْ سَرَق الدَّوْلِه
وْعَم يِعْمِل حَالُو طُفْرَانْ
ـ2ـ
إِخْدِكْ عَ سْوِيسْرَا مِنْ شَهْرْ
وِرْجِعْتُولْنَا بَعْد الضُّهْرْ
بِـ بَارِيزْ رَكَّبْلِكْ شَعْرْ
وْمِنْ رُومَا جَبْلِكْ فِسْتَانْ
ـ3ـ
اغْتَنَى بْسُرْعَه يَا لَطِيفْ
وِالنَّاسْ مْفَكِّرْتُو نْضِيفْ
نَيَّمْ شَعْبُو عَ الرَّصِيفْ
تَا يْنَامْ بْقَصْرُو فِرْحَانْ
ـ4ـ
كَرَّشْ مِنْ أَكْل الْكَفْيَارْ
وْمَا بْيِعْبُدْ غَيْر الدُّولارْ
هَرَّبْ مَالُو.. يَا سِتَّارْ
وْغَرَّقْ بِدْيُونُو.. لُبْنَانْ
***
المشهد الرابع
(أهالي تل الزعرور على المطار يحملون المظلات)
أنور:
أُفْ شُو هَالْيَوْم الْمِشْوِبْ.. وْأُفْ شُو حَظُّنْ مَنْحُوسْ هَالْمُغْتِرْبِينْ.. وِصْلُوا بِأَشْوَبْ يَوْمْ.. شَمْسُو بْتِحْرُقْ دَنَبِ الْكِرّْ..
حنتور:
أَنَا عَمْ قُولْ لَيْشْ فَاتْحِينْ الشَّمْسِيَّاتْ بِالْمَطَارْ.. تَارِي الشَّمْسْ قَوِيِّه بَرَّا..
أنور:
أَبَداً.. نِحْنَا فَاتْحِينُنْ تَا يَعِرْفُونَا الْمُغْتِرْبِينْ.. يِعْنِي فِيكْ تْقُولْ نَوْعْ مْنِ الشِّيفْرَه..
حنتور:
وَاللَّـه مَا حَدَا سَبَقْكُنْ عَ هَالشِّي.. لازِمْ تْسَجّلُوا هَالإِخْتِرَاعْ بْإِسِمْكُنْ..
أنور:
نِحْنَا مَاشْيِينْ حَسَبْ تَوْصِيّاتْ رَئِيسْ الْبَلَدِيِّه..
حنتور:
صَحِيحْ وَيْنُو رَيِّسْنا؟.. نْسِيتْ إِسْأَلَكْ عَنُّو..
أنور:
مَا قِدِرْ يِجِي عَ الْمَطَارْ.. فِي كِمْ مَشْرُوعْ عَمْ بِيخَلِّصُنْ قَبِلْ مَا يُوصَلُوا الْمُغْتِرْبِينْ..
حنتور:
لا تْصَدِّقْ.. فِي نَاسْ عَمْ بِتْحَقِّقْ مَعُو.. قَالْ سَارِقْ الدَّوْلِه..
أنور:
إِذَا كَانْ هَيْكْ بَسِيطَه.. مَا حَدَا سَرَق الدَّوْلِه وْفَاتْ عَ الْحَبْسْ..
حنتور:
هَيِئتَكْ أَعْمَى..
مُشْ شَايِفْ الْيَافْطَاتْ..
مُشْ سَامِعْ النَّاسْ عَمْ تِغْلِي غَلِي؟
الأهالي:
(يحملون يافطات ضد رئيس البلدية)
مَا بَدّنَا عِدْنَانْ
بَدّنَا مَنْتُورَه
عَمْ يِسْرُقْ لُبْنَانْ
تَا يْعَمِّرْ قْصُورَا
مَا بَدّنَا عِدْنَانْ
بَدّنَا مَنْتُورَه
عَمْ يِسْرُقْ لُبْنَانْ
تَا يْعَمِّرْ قْصُورَا
أنور:
عَجْقَه عَ الْفَاضِي.. هَوْدِي بْيِفْتَحُوا تِمُّنْ وْبِيسِدُّوهْ عَ الرُّومُوتْ كُونْتْرُولْ..
منتورة:
سْمَعُوا.. سْمَعُوا..... دْوَالِيبْ الطِّيَّارَه دَقِّتْ بِالأَرْضْ.. سَامْعِينْ التّزِيزُقْ؟.. هــــــــا هُبْ.. الطِّيَّرْجِي ضَرَبْ فْرَامْ.. الْحَمْدِللّـه عَ وْصُولُنْ بْخَيْرْ يَا جَمَاعَه..
نجيبة:
آوِيهَا.. يَا مِيةْ هَلاَ بْغِيَّابْنَا يَا مِيةْ هَلاَ
آوِيهَا.. عَ رَاسْهُنْ خَيّي الْبَطَلْ سَبْعِ الْفَلاَ
آوِيهَا.. يَا بْنَاتْ هَيُّوا طَرْحِةْ الإِكْلِيلْ
آوِيهَا.. رَاجِعْ عَ سِيدْنِي بْرِفِقْتُو سِتّ الْحَلا
لِي لِي لِي
أنور:
مُشْ هَلَّقْ يَا نَجِيبِه مُشْ هَلَّقْ.. انْطِرِي تَا يِطْلَعُوا وْبَلّشِي..
نجيبة:
لَيْشْ مَا فِيهُنْ يِسْمَعُونِي مْنِ الطِّيَّارَه؟!..
أنور:
أَكِيدْ مَا فِيهُنْ يِسْمَعُوكِي.. حَسّكِي صَوْتِكْ تَا يِطْلَعُوا..
منتورة:
هَيّئِتُنْ تْأَخّرُوا.. لَيْقُومُوا مْهَرّبِينْ حَشِيشِه وْعَمْ بِيفَتّشُوهُنْ..
حنتور:
حَشِيشِه!!.. رَاحِتْ عْلَيْكْ يَا خَيِّي مَايْكِلْ.. يَا ضِيعَانْ الْكِبِّه النَّيِّه الْعَامْلِتْلَكْ يَاهَا مَرْتْ خَيَّكْ.. وْلِكْ لَيْشْ تَا تْهَرِّبْ حَشِيشِه لَيْشْ؟.. لَيشْ يَا خُوخُو لَيْشْ؟..
منتورة:
شُو بَاكْ عَمْ تِبْكِي.. لَيْشْ خَيَّكْ مْهَرَّبْ حَشِيشِه؟..
حنتور:
مَا بَعْرِفْ.. إِنْتي عَمْ بِتْقُولي إِنُّنْ مَكْمُوشِينْ بِالْحَشِيشِه..
منتورة:
أَنَا عَمْ قُولْ لَيْقُومُوا.. لَيْقُومُوا مْهَرّبِينْ حَشِيشِه.. فْهُومْ الْحَكِي قَبِلْ مَا تِفْتَحْ زَمُّورَكْ.. فْهِمِتْ..
بو سامي:
لَيْشْ نِحْنَا نَاقِصْنَا حَشِيشِه بْهَالْبَلَدْ؟!.. مَا نِحْنَا مْحَشّشِينْ خِلْقَه.. نَاسْ بِتْحَشِّشْ مِنْ قِلِّةْ الشِّغِلْ.. وْنَاسْ بِتْحَشِّشْ مْنِ كِتْرِةِ الْجُوعْ.. وْنَاسْ بِتْحَشِّشْ مِنْ هَالأَوْضَاعْ التِّعْبَانِه.. وْنَاسْ بِتْحَشِّشْ لأَنَّا حِشَّاشِه.. وْقُولُوا أَللَّـه.
منتورة:
طَلُّوا الْمُغْتِرْبِينْ.. طَلُّوا حْبَابْ الْقَلْبْ.. زَلْغُوطَه يَا نِسْوَانْ..
نجيبة:
آوِيهَا.. عَادُوا اللِّي غَابُوا مِنْ زَمَانْ بْعِيدْ
آوِيهَا.. بَعْد الْحَرِبْ جَايِي لَعِنَّا الْعِيدْ
آوِيهَا.. WELCOME أَلِفْ WELCOME يَا مُغْتِرْبِينْ
آوِيهَا.. مِسْتِرْ بَدِرْ.. مِسْتِرْ نَخِلْ.. مِسْتِرْ سَعِيدْ
لي لي لي
رستم:
(يحمل حقيبة السفر)
آوِيهَا.. كِلّ اللِّي ذْكَرْتِي أَسَامِيهُنْ
آوِيهَا.. جَايِينْ بْتَانِي طِيَّارَه
آوِيهَا.. قُولِيهَا بَسّْ تْلاقِيهُنْ
آويها.. وْزِيدِي عْلَيْهَا إِسِمْ حَنِّه
وْمَنِّه وْمُحْسِن وْجِرْجِي
وبِنْتُو بِرْبَارَه
لِي لِي لِي
منتورة:
بِرْبَارَه!!.. بِرْبَارَه مَا غَيْرَا؟!.. بِنْتْ شِرْشِي الْمِعَّازْ؟!..
رستم:
أَيَّا مِعَّازْ أَيَّا بَلُّوطْ؟.. جِرْجِي الْمِعَّاز صَارْ مَلْيُونِيرْ.. وْجَايِي يْجَوِّزْ بِنْتُو بْتَلّ الزَّعْرُورْ..
حنتور:
الْعَمَى.. هَيْدِي بَدَّا نَقِعْ بِالْكَرْبُونَاتْ قَبِلْ مَا تِتْجَوَّزْ.. أَيَّا مَسْطُولْ بَدُّو يِتْجَوَّزَا؟!
رستم:
قَبِلْ مَا تْهِينُوا الْبِنْتْ انْطِرُوا وْشُوفُوهَا..
حنتور:
شُو بَدّنَا نْشُوفْ تَا نْشُوفْ.. نِحْنَا مْرِبَّايِينَا.. شَعْرَا أَسْوِدْ.. عْيُونَا سَوْدَا.. وْوِجَّا مِتِلْ كَعْب الطّنِجْرَه..
رستم:
بِالْعَكْسْ.. شَعْرَا أَشْقَرْ.. عْيُونَا زَرْقَا.. وْوِجَّا بْيِضْوِي مِتِلْ الْقَمَرْ..
منتورة:
إِي لَكَانْ هَالْبِرْبَارَه غَيْرْ الْبِرْبَارَه اللِّي مْنَعْرِفَا..
رستم:
هِيِّي بْذَاتَا.. أَحْلَى بِنْتْ بْأُسْتْرَالْيَا.. وْصَدّقُونِي إِنُّو بْأُسْتْرَالْيَا بْيِقِدْرُوا يْحَوّلُوا الزَّلْمِي مَرَا وِالْمَرَا زَلْمِي..
منتورة:
دَخِيلْكُنْ خِدُونِي عَ أُسْتْرَالْيَا.. وْمُشْ فَارْقَه مَعِي إِذَا بْيِعِمْلُونِي كَنْغَارو..
رستم:
شُو بِكُنْ يَا جَمَاعَه.. سَاعَه زَلْمِي.. سَاعَه مَرَا.. سَاعَه كَنْغَارُو.. وْمَا حَدَا مِنْكُنْ سَأَلْ عَنْ أَهْلُو بْأُسْتْرَالْيَا؟!
بو سامي:
إِذَا بِيوَدُّوا تْشَاكَاتْ مْنِسْأَلْ عَنُّنْ.. وْإِذَا مَا بِيوَدُّوا لَشُو نِسْأَلْ؟
رستم:
عَمْ بِفْهَمْ مِنْ هَالْحَكِي إِنُّو أَهِلْكُنْ بْأُسْتْرَالْيَا مَا بْيِسْوُوا إِلاَّ تْشَاكْ..
بو سامي:
هَيْدَا إِذَا كَانْ تْشَاكُنْ حِرْزَانْ.. هَلَّقْ عَطَانِي وَاحِدْ مْنِ الْمُغْتِرْبِينْ مَكْتُوبْ فَاضِي مِنْ خَيِّي مخّول.. وْقَبِلْ مَا إِفْتَحُو خِزَّقْتُو.. حَدَا بِيوَدِّي مَكْتُوبْ فَاضِي بْهَالإيّامْ؟!..
رستم:
وْكِيفْ عْرِفْتُو فَاضِي قَبِلْ مَا تِفْتَحُو؟!
بو سامي:
عَ الدَّسِّه.. دِسَّيْتُو مِتِلْ مَا بْدِسّ طَابِع التِّينْ.. طِلِعْ الْمَكْتُوبْ فِجّ، قِمِتْ خِزَّقْتُو عَ السَّرِيعْ.. أَنَا مُشْ فَاضِي ضَيِّعْ وَقْتِي بِسْلامَاتْ.. وْبَوْسَاتْ وْطَقّ حَنَكْ..
رستم:
خِزَّقْتْ الْمَكْتُوبْ اللِّي عْطَيْتَكْ يَاهْ YOU ARE STUPID.. O, MY GOD ..
بو سامي:
STUPID.. STUPID هَيْدِي هِيِّي الْكِلْمِه الْمُشْ عَمْ نِفْهَمْ مِعْنَاتَا
رستم:
مِعْنَاتَا.. DONKEY
بو سامي:
شُو يِعْنِي DONKEY؟.. فِينِي إِفْهَمْ شُو يِعْنِي DONKEY؟!
رستم:
يِعْنِي.. خَيَّكْ مخول مْوَدَّالَكْ وَرْقِةْ وْكَالِه بْقَلْب الْمَكْتُوبْ.. عَطَّلْ أَشْغَالُو تَا نِزِلْ عَ الْقِنِصْلِيِّه وْعِمِلَّكْ يَاهَا.. قِمِتْ حَضِرْتَكْ خِزَّقْتَا.. شُو بِتْكُونْ؟!
بو سامي:
شُو عَمْ بِتْقُولْ؟.. وَرْقِةِ وْكَالِه؟!.. صَرْلِي سِنِه نَاطِرْ هَالْوَرْقَه.. وِلِكْ لَيْشْ مَا قِلْتِلِّي قَبِلْ مَا تِعْطِينِي الْمَكْتُوبْ؟!.. وْحَقّ أَللّـه كِلّْ اللِّي بْيِجُوا مِنْ أُسْتْرَالْيَا مَشْعُوطِينْ..
رستم:
مَا حَدَا مَشْعُوطْ غَيْرَكْ.. حَدَا بِيخَزِّقْ مَكْتُوبْ عَ الدَّسِّه؟!
بو سامي:
هَيْدِي الْمُوضَه الدَّارْجِه عِنَّا.. مِنْدِسّْ وْمِنْكِبّْ..
رستم:
الْمَرَّه التَّانْيِه تْعَلَّمْ تْدِسّْ مْنِيحْ..
بو سامي:
مَعَكْ حَقّْ.. لازِمْ إِتْعَلَّمْ عَ دَسّ الْوَكَالاتْ مِتِلْ مَا
تْعِلَّمْتْ عَ دَسّ التّشَاكَاتْ..
أنور:
اسْمَعُوا يا إِخْوانْ.. بْاسْمِي وِبْاسِمْ أعضاء بَلَدِيَّة تلّ الزَّعْرورْ، وَخاصَّةً الرئيس عدنان، أُرَحِّبْ أَجْمَلَ تَرْحِيب بمُغْتَربيننا الكِرام.. وأهلاً وَسَهْلاً..
الأهالي:
مَا بَدّنَا عِدْنَانْ
بَدّنَا مَنْتُورَه
عَمْ يِسْرُقْ لُبْنَانْ
تَا يْعَمِّرْ قْصُورَا
أنور:
قِلْتِلّكُنْ اسْكِتُوا.. وَاللّه سَكْتُوا.. صَحِيحْ بْيِمْشُوا عَ الرّومُوتْ كُونْتْرُولْ.. قِلْتِلّكُنْ صَرّخُوا..
الأهالي:
مَا بَدّنَا عِدْنَانْ
بَدّنَا مَنْتُورَه
عَمْ يِسْرُقْ لُبْنَانْ
تَا يْعَمِّرْ قْصُورَا
أنور:
إِلَى الأَمَامْ سِرّْ... إِلَى الْيَمِينْ دُرْ.. إِلَى الشِّمَالْ دُرْ.. حِلْوِه الزَّعَامِه يَا عَمِّي.. النَّاسْ بَدَّا مِينْ يْدِيرَا.. قِفْ مَكَانَكْ.. مَكَانَكْ قِفْ.. سْتُوبْ.. قِلْتِلّكُنْ سْتُوبْ.. الْعَمَى.. ضَلُّوا مَاشْيِينْ!!.. انْشَاللَّه بْتُوقَعُوا وْبِتْفِكُّوا رْقْبِتْكُنْ.. صَدَقْ اللِّي قَالْ: شَعِبْنَا بْيِمْشِي مَعْ وِجُّو..
**

اقلب الصفحة من فضلك