المشهد الأول

المشهد الأول
(ساحة قرية تل الزعرور ـ ناس يرقصون)
عدنان:
يَا جَمَاعَه.. أَنَا مُشْ رَاضِي عَنْ هَـ الرَّقْصَه.. لازِمْ نِتْمَرَّنْ أَكْتَرْ تَا نْبَيِّضْ وِجّْ ضَيْعِتْنَا.. جَايِي وَفِدْ مُغْتِرْبِينْ إِلُو أَوِّلْ وْمَا إِلُو آخِرْ.. يِعْنِي بِالْعَرَبِي الِمْشَبْرَحْ قْبَرْنَا الْفِقِرْ..
منتورة:
وْبَرْكِي كَانُوا فُقَرَا.. وْمَا مَعُنْ إِلاَّ إِحِمْ إِحِمْ إِحِمْ؟!
حنتور:
جَايِينْ مِنْ أُسْترَالْيَا وْمَا مَعُنْ إِلاَّ إِحِمْ إِحِمْ إِحِمْ؟!.. هَوْنِيكْ يَا مَنْتُورَة مِنْ دُونْ مَا يِشْتِغْلُوا بْتُوصَلُّنْ التّشَاكَّاتْ عَ بْيُوتُنْ. حْكُومِتُنْ دَفِّيعَه مُشْ مِتْل حْكُومِتْنَا.. إِذَا فِي بْتِمَّكْ لِقْمِةْ خِبِزْ بِتْشَلّحَكْ يَاهَا تَا تْرِدّ الأَمْوَالْ الْمَسْرُوقَه.
منتورة:
هِنِّي بْيِسِرْقُوا وْنِحْنَا مْنِدْفَعْ.. وْمُوتْ يَا كْدِيِشْ قَبِلْ مَا يِطْلَعْ الْحَشِيشْ..
بو سامي:
يا رَيِّسْ الْبَلَدِيِّه.. يا خَواجَه عِدْنان.. فِي شَغْلِه مْهِمِّه لازِمْ تِفْهَمُوهَا.. الْمُغْتِرْبِينْ بْأُسْتْرَالْيَا بِينِقُّوا كْتِيرْ.. سَامْعِينْ الضّفَادِعْ .. مِتْل الضّفَادِعْ.. سْأَلُوا مْجَرِّبْ وْلا تِسْأَلُوا حَكِيمْ.. بْتِتْذَكّرُوا خَيِّي (مِيكْ)..
عدنان:
خَيَّكْ مِيكْ.. أَللّـه يْسَامْحُو.. زِعِلْ مِنِّي كيفْ نْدَهْتُو قِدّامْ النَّاسْ: مَخُّولْ.. وْقَلِّلي أَنَا إِسْمِي مِيكْ مُشْ مَخُّول.. وْرِجِعْ عَ سيدْنِي وْمَا وَدَّعْنِي.
أم سامي:
الْحَقّ مُشْ عَ مَخُّولْ.. الْحَقّْ عَ طَقِسْ أُسْتْرَالْيَا.. كِلّ سَاعَه بْعَقِلْ.. أَللَّـه وَكِيلْكُنْ رَحْ يِخْوِتْ وْلاَدْنَا هَوْنِيكْ..
بو سامي:
يَا جَمَاعَهْ.. خَيِّي مَخُّولْ دَوَّخْنِي.. لِمِّنْ إِجَا السِّنِه
الْمَاضْيِه شَبَّعْنِي نَقّْ.. سَاعَه انْقَطْعِتْ الْكَهْرَبَا.. سَاعَه انْقَطْعِتْ الْمَيّْ.. سَاعَه الطُّرْقَاتْ مِلْيَانِه جُوَرْ..
أم سامي:
سَاعَه..
بو سامي:
عَمّ بِيعَقِّصْنِي الْبَرْغَشْ..
أم سامي:
سَاعَه..
بو سامي:
الدُّولارْ غِلِي..
أم سامي:
سَاعَه..
بو سامي:
الدُّولارْ وِطِي..
أم سامي:
سَاعَه..
بو سامي:
فَوْضَى..فَوْضَى.. فَوْضَى..
أم سامي:
مْنِيحْ الْـ مَا عِمِلَّكْ مَرَضْ قَلْبْ يا رِجَّال..
بو سامي:
عِمِلِّي مَرَضْ قَلْبْ مِنْ نَوْعْ تَانِي.. وِجِعْنِي قَلْبِي عْلَيْه لِمِّنْ شِفْتُو عَمْ يِتْكَبَّرْ عَ بْلادُو.. وْقِلْتِلُّو بْصَوْتْ عَالِي: سْمَاعْ يَا مَخُّولْ.. يَا مِيكْ.. يَا حَضْرِةْ الْمُغْتَرِبْ.. اللِّي بْيِتْكَبَّرْ عَ بْلادُو مَا فِيهْ خَيْرْ لِبْلادْ بَرَّا..
نجيبة:
أَكِيدْ ضَبّ شَنَطُو وْرِجِعْ عَ أُستْرَالْيَا..
بو سامي:
بِالْعَكْسْ.. كَانْ كْتِيرْ مِتْفَهِّمْ.. تْطَلَّعْ فِيِّي وْقَلّلي: STUPID
منتورة:
شُو قَالْ.. شُو قَالْ؟!
بو سامي:
STUPID.. وْلِمِّنْ سْأَلْتُو شُو بْتِقْصُدْ.. قَللِّي تْطَلَّعْ حْوَالَيْكْ.. اللِّي مِتْلَكْ كْتَارْ..
منتورة:
STUPID بِالإِنْكلِيزِي.. مِعْنَاتَا STUPID بِالْعَرَبِي..
أم سامي:
حِلِّي مِنْ هَوْنْ يَا مَنْتُورَه.. مَا حَدَا فَاضِيلِكْ..
عدنان:
اللّي فْهِمْتُو مْنِ كْلاَمْ بو سامي إِنُّو لازِمْ نْزَفِّتْ طُرْقَاتْ الضَّيْعَه.. وِنْعَبِّي خِزَّانَات الْمَيّْ تَا مَا حَدَا يْنِقّ مْنِ الْمُغْتِرْبِينْ..
حنتور:
بْلادْنا كِلاّ يَنَابِيعْ.. كِلاَّ نْهُورَا.. مَا لازِمْ تِنْقِطِعْ فِيهَا الْمَيّ!.. بَعِدْ فِي جِرْصَه أَكْبَرْ مِنْ هَـ الْجِرْصَه.. مَيِّتْنَا رَايْحَه عَ الْبَحِرْ وْمَا فِي حَاجِزْ بِيوَقِّفَا.. مِتِلْ مَا بِيوَقّفْنَا كِلّ دْقِيقَه..
بو سامي:
إِذَا الدَّوْلِه مُشْ قَادْرَه تِحْبِس الْمَيّ.. تْجِبْلا شِي شِرْكِه أَجْنَبِيِّه وِتْلَزِّمَا كِلْ شِي فِي سْدُودْ.. سَدّ عَ نَهِرْ قَادِيشَا.. سَدّ عَ نَهْر الْبَارِدْ.. سَدّ عَ نَهْر الْكَلْبْ.. سَدّ عَ نَهْر الدَّامُورْ.. سَدّ عَ نَهْر بَيْرُوتْ..
أم سامي:
سِدّ بُوزَكْ يا رجّال.. قَبِلْ مَا يْسِدُّولَكْ يَاهْ..
بو سامي:
مُشْ رَحْ سِدُّو.. وْعَ كِلّ سَدّ لازِمْ يْعَمّرُوا شِرْكِة كَهْرَبَا.. وْهَيْكْ مِنْكُون ضْرَبْنَا عَصْفُورَيْنْ بْحَجَرْ وَاحِدْ..
أم سامي:
زَوْجي زَوْجِي أَنْتَ مُهْتَمٌّ بْأُمُورٍ كْتِيرِه وِالْمَطْلُوبْ هُوَ وَاحِدْ: تِشْلِيحْ الْمُغْتِرْبِينْ تْيَابُنْ..
أم أنطون:
تِشْلِيحْ .. تِشْلِيحْ.. تِشْلِيحْ.. شُو هَـ الِبْلادْ الْـ كِلاَّ تِشْلِيحْ.. بَدَلْ مَا تْقُولُوا هَوْدِي وْلاَدْنَا.. هَوْدِي أَهِلْنَا.. لازِمْ نِعْمِل الْمُسْتَحِيلْ تَا يْحِبُّوا بْلادُنْ وِيْحِبُّونَا.. بَرْكِي بْيِرْجَعُوا عَ طُولْ.
أم سامي:
أمّ أَنْطُونْ صَارِتْ خِرْفَانِه.. لا تْوَاخْذُوهَا..
أم أنطون:
أمّ أَنْطُونْ مُشْ خِرْفَانِه.. إِمّ أَنْطُونْ شَايْفِه كِيفْ عَمْ
تِنِتْفُوا الْمُغْتِرْبِينْ.. إِمّ الْيَاسْ سَرْقِتْ تْيَابْ إِخْتَا وْلَوْ مَا يِطْلَعْ قْيَاسِي عَ قْيَاسَا رِجْعِتْ عَ أُسْتْرَالْيَا عِرْيَانِه..
أم سامي:
يَا إِمّ أَنْطُونْ.. يِرْحَمْ تْرَابِكْ قَبِلْ مَا تْمُوتِي.. خَلِّينَا نْكَفِّي مَشْرُوعْنَا..
أم أنطون:
لا تْقُولُولِي نْسِيتُو شُو عِمِلْ نَجِيبْ بْإِخْتُو.. عِرِفَا مَا بْتَعْرِفْ تِقْرَا قَامْ لَوَّنْلا إِصْبَعَا هِيِّي وْنَايْمِه بِشْوَيِّةْ حِبِرْ وْمَضَّاهَا عَ كِلّ الأَرَاضِي.. تْفِهْ عْلَيْكْ يَا إِنْسَانْ.. تْفِه.. تْفِه.. تْفِه..
حنتور:
خَلَصْ يَا إِمّ أَنْطُونْ.. بَدّنَا نْعِيشْ.. بَدّنَا نَاكُلْ.. عِنَّا وْلادْ زْغَارْ.. الْمُغْتِرْبِينْ مَعُنْ دُولارْ.. نِحْنَا شُو مَعْنَا؟!
أم أنطون:
مَعْنَا عِزِّةْ نَفِسْنَا وْكِبْرِيَاءْنَا.. وْهَيْدَا أَكْبَرْ كَنْزْ بِالدِّنِي..
حنتور:
نِحْنَا طَالْعِينْ مِنْ حَرْبْ عِشْرِينْ سِنِه.. هِنِّي طَالْعِينْ مِنْ مَاكْدُونَالْدْ وِبِيتْزَا هَاتْ..
أم أنطون:
مَا قَصّرُوا مَعْنَا أَبَداً.. لَوْلاهُنْ مِتْنَا مْنِ الْجُوعْ.. وْلَوْلاهُنْ مَا بِقِي لُبْنَانْ!!
أم سامي:
زَقّفُولاَ.. زَقّفُولا.. بَرْكِي بِتْفِلّْ عَنَّا..
عدنان:
قَوِلْكُنْ شُو لازِمْ نِعْمِلْ.. مْنِعْرُضْ عْلَيْهُنْ تَوْأَمِةْ ضَيْعِتْنَا مَعْ ضْيَاعْ أُسْتْرَالْيَا..
حنتور:
لَهْ.. لَهْ يا رَيِّسْ.. كِلْ شِي وْلا التَّوْأَمِه.. وْحَقّ أَللَّـه مَا بِتْعُودُوا تِخْلَصُوا مِنُّنْ.. وَفِدْ رَايِحْ وَفِدْ جَايِي.. كِلُّنْ بِيحِبُّوا الوَجَاهَه.. وْلَوْلا الْوَجَاهَه مَا بِتْشُوفُوا وْجُوهُنْ..
عدنان:
إِذَا كَانْ هَيْكْ مْنِعْمِلُّنْ حَفْلاتْ تَكْرِيمِيِّه.. وِبْكِلّ حَفْلِه مِنْلِمّ لْمَشْرُوعْ خَيْرِي.. وْأَللَّـه مَا يْخَلِّينِي إِذَا مَا مِنْشَلِّحُنْ كِلّ مِصْرِيَّاتُنْ.. سَاعِتْهَا مْنِلْعَبْ بِالْمَال لِعِبْ..
(يخرج عدنان وبعض الأهالي)
منتورة:
دُولارْ نَازِلْ.. دُولارْ طَالِعْ.. تَاكْسِي نَازِلْ.. تَاكْسِي طَالِعْ.. فِسْتَانْ نَازِلْ.. فِسْتَانْ طَالِعْ.. وْشِخِّي يَا مَنْتُورَه شِخِّي..
نجيبة:
مُشْ شِخِّي.. جِخِّي.. جِخِّي يَا مَنْتُورَه جِخِّي.. قُولِي وَرَايِي: جِيمْ
منتورة:
شِيمْ
نجيبة:
جِيمْ
منتورة:
شِيمْ
نجيبة:
قُولِي جَبَلْ..
منتورة:
شَبَلْ
نجيبة:
قُولِي جِرْجِي
منتورة:
شِرْشِي
نجيبة:
قُولِي جَحِشْ
منتورة:
شَحِشْ
نجيبة:
خَلِّيكِي شَحْشِه أَحْسَنْلِكْ.. قَبِلْ مَا شِبْلِكْ آخِرْتِكْ..
(تدخل لبيبة مسرعة)
لبيبة:
يَا بَاطِل.. يَا بَا طِلْ.. يَا بَاطِلْ.. مَا حَدَا يِحْكِي مَعِي أَبَداً..
منتورة:
شُو بِكِي.. شُو صَابِكْ؟.. حَدَا مَاتْ؟
لبيبة:
ماتِتْ لِيرِتْنَا اللُّبْنَانِيِّه.. الدُّولارْ خَطَفْلاَ رُوحَا..
منتورة:
أَللـه يِرْحَمْ لِيرِتْنَا شُو كَانِتْ شَايْفِه حَالاَ.. كَانِتْ تْنَزِّلْ الْفَارِسْ عَنِ حْصَانُو.. هَلَّقْ مَا بْتِسْوَى فِشْكِه.. قَصّرُولاَ عُمْرَا هَـ الْحُكَّامْ وْهِيِّي بْعِزّ صْبَاهَا..
نجيبة:
روحُوا تَا نْنَضِّفْ بْيُوتْنَا قَبِلْ مَا يُوصَلُوا الْمُغْتِرْبِينْ.. وِيْبَلّشُوا يْنِقُّوا..
لبيبة:
ـ1ـ
رِخْصِتْ يَا إِمِّي اللِّيرَه
وْعَمْ تِرْخَصْ زْيَادِه
يَا لِيرَه ضَلِّي لِيرَه
كْرَامِةْ أَهْل بْلاَدِي
ـ2ـ
يَا دُولارْ.. يَا دُولارْ
عَمْ تِدْبَحْنَا يَا دُولارْ
سِعْرِ اللَّحْمِه وْسِعْرِ الْعَضْمِه
كِلُّو صَفَّى بِالدُّولارْ
لِقْمِتْكُنْ يَا وْلادِي
شْحَادِه وَاللّـه شْحَادِه
سَرْقُوا خَيْر بْلادِي
رِدُّوا.. رِدُّوا خَيْر بْلاَدِي
**

اقلب الصفحة من فضلك